Qu'èi lejut que i a quauques setmanas un deus prumèrs romans ("conte filosofic" segon l'autor) de Robèrt Lafònt, un de'us qui estón reeditats, dens la colleccion "A Tots", en ua tèra de cubèrta blua: "Tè tu tè ieu". Quin Lafònt e sap serví's deus sons talents de contaire entà'ns gahar dens lo raconte a las prumèras linhas, envescar-ns'i, e fin finala obligà'ns a'u seguir dinc a la fin!

Qu'ei lo raconte per un lingüista de l'Universitat de Montpelhièr -quauqu'un qui's sembla, lhèu, a l'autor?- d'uas vacanças passadas au Grau, e tot que i ei, la horrèra vienuda de França deu nòrd, d'Alemanha e d'alhors, lo campatge dab los vesins de tenda o de caravana e l'espèra entà passar a la docha la pelada, las discotècas, l'amor... Que m'a brombat de las meas vacanças d'antan, de quan lo pair, CRS, animava l'estiu un CLJ (Centre de lesers entaus joens) a Hòssagòrt. Dab lo temps, qu'avoi enveja de vacanças mei luenhècas e mei culturaus, mes aqueras setmanas de bòrd de mar on arren ne hè compte sonque estene's suu sable e vàder morets, har a la petanca, e dançar... que son pausas agradivas deu charmatòri secret de l'arren•har complet.

Lo roman aqueste que compta "l'extraordinària aventura" viscuda per dus òmis qui possedeishen ua dròga capabla de penetrar dens la consciéncia autrei. Qu'ei deus libes qui'vs poderetz har seguir tà la pelada e léger en v'avisant que non s'i empeguen pas tròp de grans de sable, com un gran roman policièr o de sciéncia-ficcion. Dab ua resèrva totun: las justificacions teoricas de l'enterpresa, basadas d'un costat sus la lingüistica e los recèrcs deu noste lingüista, de l'aute sus la psicanalisi qui ei la partida deu son companh d'aventura, que son complicadas, de mau seguir, lhèu fantasiosas? (que m'ac demandi) e subertot qu'apesanteishen lo raconte, tan brivent la rèsta deu temps. Que son de dòu har, aqueras intrusions "intellectualistas" qui ns'empachan de léger "Tè tu tè ieu" d'ua alet.

Exceptat aquò, l'òbra qu'a totas las caracteristicas d'ua literatura "populara", au sens mei noble deu tèrmi, dab ua lenga simpla mes natra au servici d'ua intriga plan demiada.

Que guardarèi en cap un personatge de "Tè tu tè ieu", qu'ei la misteriosa "filha de Singapor" -un magazin de lilòis exotics- qui envesca los passatjants per la soa sola preséncia. Qu'ei a l'arrèrplan de tot, e com tiravi de cap tà la fin que cranhí que l'autor e l'avosse desbrombada, e clavèsse lo libe shens la nse hicar un darrèr còp davant los uelhs. Mes Lafònt ne ns'anava pas quitar atau, shens la har tornar, a la bèra fin, entà'ns díser: "Siáu degun, la filha de Singapor, que lèu partirà d'aicí, e qu'un autre estiu serà sus una autra plaja." Be l'i seguirem dab plaser, com la seguí, probable, lo narrator...